Assagi ma nwala timura yufafen, a naf gant azal i tutlayin nnsent, fkant ccan i yemyura armi tegwet tira, tessaɣ ugar n yeḥricen nniḍen yessɛan azal, ama : di Fṛansa, neɣ d Lalman, d Marikan, artg... Acku, d annect-agi i d llsas n tɣerma d weslelli, d unegmu n talsa s-umata. Ladɣa ma neger tamawt, a naf wigi meṛṛa i-d-bedreɣ a naf ur ǧǧin abziz di tegemmi nnsen ur t urin ara, yal taɣawsa uran-tt, a naf rsent deg wemkan yelhan s waṭas, am tmedyizt nnsen taɣerfant, am tmucuha, am yinzan. Ihi, inzan nnsen ɣas ulama llan deg yedlisen n kra n yemyura d imedyazen, maca rnan wwin-ten s idlisen ikadimiyen, yecban amawal: le Petit Larousse, gan-ten din-a i-wakken ad ibin wazal n tgemmi ugar n tɣawsiwin nniḍen. Ɣef waya i-d-zwareɣ s-imeslayen agi ɣef tutlayin tijenṭaḍin, acku d aya i sarmeɣ i tutlayt nneɣ Tamaziɣt, yiwwas ula d nettat a ttuɣal teǧhedd am tutlayin i-d-yufraren deg wmaḍal, kra tessɛa d ttigemmi ad yettwaru ad yadef ɣer tkadimit, syen akkin ad binen wid ara d-ittwafernen d udmawen ibidakujiyen, wid ara iteddun d iɣerbazen, ad bḍun ɣef yeswiren, seg wmezwaru, alama d aɣerbaz alemmas; alama d ttasnawit; alama d ttasedawit.
Yewwi-d ad ttegwet tira Tamaziɣt, tutlayt ad ttaččaṛ s tira armi d ayen i-wumi ur tezmir, ayen yelhan yessɛan azal d unamek ur yettɣima d asuki, ama di "tmucuha"; ama deg "tmedyazt taɣerfant"; ama deg "yinzan"; ama di "tsekla tamirant".
---------------------------------
amawal:
tamirant : actuelle
tigemmi : patrimoine
taɣerfant : populaire
aslelli : libre
tajenṭaṭ, tijenṭaḍin : etrangere,(s)
taɣerma : civilisation
-------------------------------
Amar Tafat, amyaru, aselmad n tmaziɣt