Idles-iw

Llaẓ ur yesserbaḥ, ur d-yettawi ayen yelhan, amdan ma yekker-ed yelluẓ di tazwara ad yenṭeṛ di tezmert, i-syen akkin yezmer ad-t-adfen iɣewaɣen, acku ma ur yemmid ara ur yezmir ad-yeṣbeṛ syen ar as d-bdun wuguren. Yeqqaṛ umussnaw Ccix Muḥend ɣef usentel-a n llaẓ "anwa i d-aḥbib r-Ṛebbi d win yelluẓen yeṣbeṛ". Yal cci iban ur yeffir yal taɣawsa deg umkan-is, iberdan banen s-anda suffuɣen, awal n Ccix d-aya i d-yeqsed. Llaẓ yessekcam ɣer usuter d ṭṭmeɛ, asuter d ṭṭmeɛ d iɣewaɣen ur nelhi, acku aṭṭemaɛ yezmer ad-t-isexdem walebɛeḍ yessɛan deg ubrid n ẓẓuṛ. Llan akka wid yeṭṭamaɛen, ṭafaṛen widen yessɛan am izamaren n temɣaṛt, widak i-tt-yetabaɛen s-iniɣman d yal taɣawsa.

Di tama nniḍen win i d-yekkren di rezgg yeṛwa diɣen yezmer ad-yecceḍ ɣer yifri n ẓẓuṛ d uḥqaṛ n medden ur d-yettawi s-usalli, yal tikelt yewwi-d ad-iɛas iman-is umdan ɣef tuccḍa ɣer wannu, ama yelluẓ ama yeṛwa. Qqaren deg yinzi imezwura "win yeṛwan yexdeɛ Ṛebbi", inzi-ya ur d-yerzi ara akk widen yessɛan, maca yerza-d win ixuṣṣen di tigzi(lefhama), am akken i-d-nniɣ di tazwara, amdan iwata ad-yili d imegzi(d lfahem), amdan ma yefhem ddunnit anagar taɣawsa yelhan ara yeg akken yebɣu yili. Llan yimdanen ɣas lluẓen yili nutni d-imussnawen, awal nnsen ifetti tiyersiwin, ɛyan fran tillufa yenḍen, am akken qqaṛen di tenfalit n teqbaylit "a win ur nessɛi nwal, ṣeddeq awal, mmel-as abrid i udeṛɣal". Am akken llan wid yessɛan nutni gzan ɛyan gan timsal yelhan ullen imeɣban, ullen tudrin, artg...

                                 A. Tafat